قومی کمیشن برائے خواتین نے جنوبی کولکاتہ میں پیش آئے ایک واقعے کا از خود نوٹس لیا ہے جس میں قانون کی ایک طالبہ کے ساتھ کالج کے احاطے میں مبینہ طور پر اجتماعی عصمت دری کی گئی۔ کمیشن نے کولکاتہ کے پولیس کمشنر کو ایک خط تحریر کیا ہے جس میں اس نے واقعے پر گہری تشویش کا اظہار کیا ہے اور کارروائی سے متعلق تفصیلی رپورٹ تین دن کے اندر پیش کرنے کا مطالبہ ہے۔

اس واقعے میں ملوث ایک اہم ملزم کی ترنمول کانگریس کے طالب علم لیڈر کے طور پر شناخت ہونے کے بعد کل پورے کولکاتہ میں مظاہرے شروع ہوگئے۔ اپوزیشن پارٹیوں نے بھی ممتا بنرجی کی قیادت والی ترنمول کانگریس کی سخت نکتہ چینی کی اور حکمراں پارٹی کے لیڈروں اور مجرمانہ عناصر کے درمیان ساز باز ہونے کا الزام لگایا۔

اس واقعے کے تعلق سے اب تک لاء کالج کے دو موجودہ طلبا اور ایک سابق طالب علم کو گرفتار کیا گیا ہے۔ تینوں ملزمین کو منگل تک پوچھ تاچھ کے لیے پولیس تحویل میں دے دیا  گیا ہے۔x