قومی تحقیقاتی ایجنسی NIA نے پچھلے سال 2024 کے دوران، کچھ ایسی کامیابیاں حاصل کرنے کے بارے میں بتایا ہے، جو پہلے کبھی حاصل نہیں کی گئی تھیں۔ NIA کے مطابق اِن کامیابیوں میں، 100 فیصد مجرموں کا گردانا جانا شامل ہے۔ 25 مقدمات میں ملزموں کی تعداد 68 تھی، جنہیں مجرم گردانا گیا ہے۔ افسران نے، اِس کامیابی کا سہرا، تندہی سے کی جانے والی تحقیقات اور باریک قانونی حکمتِ عملی کو دیا ہے۔
ایجنسی کے مطابق 2024 میں، NIA کے ہاتھوں درج کیے گئے 80 مقدمات میں مجموعی طور پر 210 ملزموں کو گرفتار کیا گیا۔ اِن میں سے بائیں بازو کی انتہا پسندی کے 28 مقدمات اور شمال مشرقی شورش کے 18 مقدمات سرِ فہرست تھے۔

اِس فہرست میں جموں و کشمیر میں دہشت گردی سے متعلق 7، دھماکہ خیز مادّے سے متعلق 6 اور انسانی تجارت سے متعلق 5 کیسز ہیں۔ ایجنسی نے، دہشت گردی سے متعلق 4 دیگر مقدمات، خالصتان سے متعلق 4 مقدمات، ISIS سے متعلق2، اور بدمعاشوں کے گروپ، سائبر دہشت گردی، جعلی کرنسی نوٹس اور دیگر زمروں سے متعلق ایک-ایک کیس بھی درج کیا ہے۔ NIA نے بتایا کہ 25 مقدمات میں 68 ملزموں کو مجرم گردانے جانے کے ساتھ ساتھ 2024 میں، اُس کی مؤثر کارکردگی میں، 408 ملزموں کی فردِ جرم تیار کرنا بھی شامل رہی۔ ×