इंडिगो कंपनीच्या विस्कळीत विमानसेवेमुळे निर्माण झालेली परिस्थिती लवकरच नियंत्रणात येऊन उद्यापर्यंत परिस्थिती सामान्य होईल. तसंच येत्या तीन दिवसांत विमानसेवा पूर्वपदावर येईल, असं नागरी विमान वाहतूक मंत्रालयानं म्हटलं आहे. विमान सेवा कालमर्यादेचा आदेश नागरी विमान वाहतूक संचालनालयानं तात्काळ प्रभावाने स्थगित केला आहे. विमान कर्मचाऱ्यांनी घेतलेली आजारपणाची रजा किंवा विशेषाधिकार रजा त्यांच्या अनिवार्य साप्ताहिक विश्रांती कालावधीत घेतलेली रजा म्हणून मोजायला मनाई करणारा नियम नागरी विमान वाहतूक संचालयानं मागे घेतला आहे. हवाई सुरक्षेशी कोणतीही तडजोड न करता ज्येष्ठ नागरिक, विद्यार्थी, रुग्ण आणि अत्यावश्यक कारणांसाठी विमानसेवेवर अवलंबून असणाऱ्यांच्या हितासाठी हा निर्णय घेतल्याचं मंत्रालयानं सांगितलं आहे. यासर्व प्रकाराची चौकशी करण्यासाठी केंद्र सरकारनं एक उच्चस्तरीय चौकशी समितीही स्थापन केली आहे.
इंडिगोची १ हजाराहून अधिक विमान शुक्रवारी रद्द झाली. परिस्थिती पूर्वपदावर यायला १० ते १५ डिसेंबर होईल, अशी शक्यता कंपनीचे मुख्य कार्यकारी अधिकारी पीटर एल्बर्स यांनी व्यक्त केली आहे. विमान रद्द होत असल्यानं प्रवाशांच्या होत असलेल्या गैरसोयीबद्दल त्यांनी माफी मागितली आहे. दरम्यान उड्डाण रद्द केलेल्या विमानातल्या सर्व प्रवाशांना पूर्ण पैसे तत्काळ परत करा, असे आदेश सरकारनं इंडिगोला दिले आहे.
प्रवाशांची गैरसोय काही प्रमाणात कमी व्हावी यासाठी रेल्वेगाडयांना अतिरिक्त डबे जोडण्यात आले आहेत.
