नीरा देवघर प्रकल्पाच्या उजवा मुख्य कालवा दुसऱ्या टप्प्याच्या प्रारंभासह १ हजार ३५२ कोटी रुपये खर्चाच्या विविध विकास कामांचं भूमिपूजन आणि लोकार्पण मुख्यमंत्री देवेंद्र फडनवीस यांच्या हस्ते आज फलटण इथं झालं. फलटण आणि माळशिरसला या प्रकल्पामुळे पाणी मिळणार असून हरित माणदेश निर्माण करणं हे सरकारचं उद्दिष्ट आहे, असं मुख्यमंत्री यावेळी म्हणाले. नीरा देवघर, जिहे कटापूर, टेंभू उपसा योजनेच्या वेगवेगळ्या टप्प्यातून दुष्काळी तालुक्यांना पाणी दिलं आहे. सांगोल्यासारख्या दुष्काळी भागात पाणी पोहोचवण्यात यश आल्याचं मुख्यमंत्र्यांनी सांगितलं.
नीरा देवघर प्रकल्पातील तीन उपसा सिंचन योजनांना सुधारित प्रशासकीय मान्यता देण्यात येईल, माळशिरस तालुक्यातल्या बावीस गावांना पाणी पोहोचवलं जाईल, असं आश्वासन त्यांनी दिलं. फलटण-शिंगणापूर रस्त्यावरील नाईक बंबवाडी इथं महाराष्ट्र औद्योगिक विकास महामंडळाच्या वसाहतीमध्ये औद्योगिक प्रकल्पासह विविध विकासकामं सुरू करण्यात येतील, अशी ग्वाही त्यांनी दिली.
यावेळी मुख्यमंत्र्यांनी डॉ. संपदा मुंडे यांच्या आत्महत्येबद्दल दुःख व्यक्त केलं तसंच त्यांच्या मृत्यूला जबाबदार असणाऱ्यांना शिक्षा होईल असं आश्वासन दिलं. या प्रकरणात काही जणांनी राजकारण करत माजी खासदार रणजीत नाईक निंबाळकर आणि आमदार सचिन पाटील यांचं नाव गोवण्याचा प्रयत्न केला, मात्र असं असतं तर आपण या कार्यक्रमाला आलो नसतो असं सांगत मुख्यमंत्र्यांनी निंबाळकर आणि कांबळे यांच्यावरील आरोप फेटाळून लावले.
