بی جے پی کے سرکردہ لیڈر اور سابق مرکزی وزیر روی شنکر پرساد نے کہا ہے کہ آپریشن سندور اور پہلگام دہشت گردانہ حملے کے بعد سات پارلیمانی وفود کی زیر قیادت سفارتی رابطوں کی پہل سے عالمی پلیٹ فارم پر متفقہ انداز سے بھارت کے موقف کو پُر زور انداز سے پہنچایا گیا ہے۔
آج پٹنہ میں نامہ نگاروں سے بات کرتے ہوئے جناب پرساد نے کہا کہ وزیر اعظم نریندر مودی نے پارٹی وابستگی کے قطع نظر ارکان پارلیمنٹ کو شامل کرنے کا جو فیصلہ کیا تھا، وہ 140 کروڑ بھارتی شہریوں کے مفاد میں تھا۔ جناب روی شنکر پرساد نے کہا کہ کُل جماعتی وفود کے سفارتی رابطے کی اس پہل کے ذریعے بھارت دہشت گردی کے بارے میں اپنی تشویش اور دہشت گردی کی لعنت سے اپنے شہریوں کا دفاع کرنے کے اپنے حق کے تعلق سے عالمی سطح پر اپنا موقف پیش کرسکا ہے۔
انھوں نے یہ بھی کہا کہ مختلف ملکوں میں اِن میٹنگوں کے دوران غیرملکی رہنمائوں، دانشور افراد اور دیگر اہلکاروں نے ایک آواز میں پہلگام کے وحشیانہ حملوں کی مذمت کی۔