کرکٹ کی ICC چیمپئنس ٹرافی میں، کل پاکستان کے لاہور میں آسٹریلیا اور افغانستان کے درمیان کھیلا گیا، گروپ B کا ایک اہم میچ بارش کی نذر ہو گیا، جس کے بعد آسٹریلیا سیمی فائنل میں پہنچ گیا ہے۔ جیت کے لیے مقررہ 274 رن کے ہدف کو حاصل کرنے کے لیے آسٹریلیا نے 12 اعشاریہ 5 اوورس میں ایک وکٹ پر 109 رن بنائے تھے۔ اس کے بعد شدید بارش کے سبب میچ کو روکنا پڑا اور دونوں ہی ٹیموں کو ایک-ایک پوائنٹ دے دیا گیا۔ اس سے پہلے بلّے بازی کرتے ہوئے افغانستان نے مقررہ 50 اوورس میں 273 رن بنائے تھے۔ آسٹریلیا اب بھارت اور نیوزی لینڈ کے گروپ میں شامل ہو گیا ہے۔ یہ دونوں ٹیمیں پہلے ہی سیمی فائنلز میں پہنچ چکی ہیں۔

گروپ B میں 3 پوائنٹ کے ساتھ افغانستان تیسرے مقام پر ہے۔ آسٹریلیا بہتر رن اوسط کی بنیاد پر 3 پوائنٹ کے ساتھ دوسرے نمبر پر ہے۔ انگلینڈ ٹورنامنٹ سے باہر ہو گیا۔ ایک بھی میچ نہ جیتنے کے سبب وہ چوتھے مقام پر برقرار ہے۔

آج شام کراچی کے نیشنل اسٹیڈیم میں، گروپ B کے آخری میچ میں جنوبی افریقہ کا مقابلہ انگلینڈ سے ہوگا۔ جنوبی افریقہ اگر اس میچ میں جیت حاصل کرے گا یا برابری پر ختم کرلیتا ہے تو وہ سیمی فائنلز میں پہنچ جائے گا۔ البتہ انگلینڈ اگر جنوبی افریقہ سے 207 یا اس سے زیادہ رنوں سے ہار جاتا ہے تو افغانستان سیمی فائنلز میں پہنچ سکتا ہے۔x