پارلیمانی امور کے وزیر کرن رجیجو نے اپوزیشن ارکان کی جانب سے پارلیمنٹ کی کارروائی میں رکاوٹ ڈالے جانے پر ناراضگی ظاہر کی ہے۔ انہوں نے کہا کہ سرکار آئینی اور پارلیمانی طور طریقوں نیز ضابطوں کے مطابق ہر معاملے پر بحث کے لیے تیار ہے۔ جناب رجیجو نے کہا کہ بہار میں ووٹر فہرستوں پر خصوصی تفصیلی نظرِ ثانی کا معاملہ سپریم کورٹ میں زیرِ سماعت ہے اور اس پر ایوان میں بحث نہیں ہو سکتی۔

وزیر موصوف نے کہا کہ پارلیمنٹ میں خصوصی نظرِ ثانی معاملے پر بحث کرنا، ضابطوں اور روایات کو توڑنے کے مترادف ہوگا۔ جناب رجیجو نے زور دے کر کہا کہ اس سلسلے میں یہ ضابطے بالکل واضح ہیں کہ انتخابی کمیشن جیسے خود مختار اداروں کے کام کاج پر بحث نہیں کرائی جا سکتی۔

پارلیمنٹ کے دونوں ایوانوں میں ووٹر فہرست پر خصوصی نظرِ ثانی اور دیگر معاملات پر اپوزیشن کے شور و غل کے تناظر میں کارروائی میں کل بھی رکاوٹ پڑی۔×