وزیر دفاع راجناتھ سنگھ نے کہا ہے کہ بھارت اختراعی اور تکنیکی فروغ کو بڑھاوا دے کر اور اندرونِ ملک کمپنیوں کیلئے ترقی کا مناسب ماحول پیدا کرکے ایک مضبوط دفاعی نظام قائم کر رہا ہے۔ انھوں نے کہا کہ ملک پانچویں سلسلے کے لڑاکا ہوائی جہاز تیار کرنے اور ہوائی جہازوں کا انجن بنانے کی سمت آگے بڑھ رہا ہے۔ جناب راجناتھ سنگھ نے کہا کہ ملک میں فرانس کی کمپنی Safran کے ساتھ طیاروں کے انجن بنانے کا کام شروع ہونے والا ہے۔ آج نئی دلّی میں ایک تقریب کے دوران اظہارِ خیال کرتے ہوئے وزیر دفاع نے کہا کہ سرکار نے 97 تیجس لڑاکا ہوائی جہاز بنانے کیلئے HAL کے ساتھ ایک نئے آرڈر کو منظوری دی ہے، جس پر 66 ہزار کروڑ روپئے کی لاگت آئے گی۔ انھوں نے بتایا کہ HAL کو اِس سے پہلے 48 ہزار کروڑ روپئے کی لاگت پر83 ہوائی جہاز تیار کرنے کا آرڈر دیا گیا تھا۔ جناب راجناتھ سنگھ نے سبھی غیرملکی کمپنیوں اور سرمایہ کاروں کو مدعو کیا کہ وہ آگے آئیں اور بھارت کے مضبوط دفاعی مینوفیکچرنگ نظام میں سرمایہ لگائیں۔