وزیر دفاع راج ناتھ سنگھ نے کہا ہے کہ برہموس میزائل نے آپریشن سندور کے دوران نمایاں کارکردگی کا مظاہرہ کیا ہے۔ انھوں نے کہا کہ آپریشن سندور کے بعد غیر ممالک میں برہموس میزائل کی مانگ میں اضافہ ہوا ہے۔ اپنے پارلیمانی حلقے لکھنؤ کے دورے کے دوسرے دن نیشنل PG کالج میں اترپردیش کے سابق وزیر اعلیٰ چندر بھانو گپتا کے مجسّمے کی نقاب کشائی کے بعد وزیر دفاع نے کہاکہ 14 ممالک نے برہموس میزائل کا مطالبہ کیا ہے اور اِن کی برآمدات لکھنؤ سے کی جائے گی۔ 
وزیر دفاع نے کہا کہ اترپردیش ملک کے سیاسی سفر کا ایک اہم مرکز ہے۔ یہ ریاست ملک کا رخ طے کرتی ہے اور یہاں پیدا ہونے والے رہنمائوں اور مجاہدین آزادی نے ہمیشہ اِس ملک کو نئی بلندیوں تک پہنچایا ہے۔ چندر بھانو گپتا اُن رہنمائوں میں شامل ہیں جنھوں نے ملک کو صحیح سمت میں لے جانے میں اپنا اہم کردار ادا کیا۔ وزیر موصوف نے اِس موقع پر اُن کے اعزاز میں ایک ڈاک ٹکٹ بھی جاری کیا۔