وزیرِ اعظم نریندر مودی آج نئی دلی میں چیف سیکریٹریوں کی پانچویں قومی کانفرنس کی صدارت کریں گے۔ انھوں نے کَل بھی اِس کانفرنس کی صدارت کی تھی۔ ایک سوشل میڈیا پوسٹ پر وزیرِ اعظم نے کہا کہ کانفرنس کے دوران انہوں نے حکمرانی اور اصلاحات سے متعلق مختلف امور پر بامعنی اور نتیجہ خیز تبادلہئ خیال کیا۔ یہ تین روزہ کانفرنس، جس کا آغاز جمعے کو ہوا تھا، قومی ترقی کی ترجیحات پر منظم اور مسلسل بات چیت کے ذریعے مرکز اور ریاستوں کے درمیان شراکت داری کو مضبوط بنانے کے مقصد سے منعقد کی گئی ہے۔ وزیرِ اعظم کے امدادِ باہمی پر مبنی وفاقیت کے نظریے سے ہم آہنگ یہ کانفرنس ایک ایسا پلیٹ فارم فراہم کرتی ہے، جہاں مرکز اور ریاستیں مل کر ملک کی انسانی سرمایہ کی صلاحیت کو مکمل طور پر بروئے کار لانے نیز جامع اور مستقبل سے ہم آہنگ ترقی کو تیز کرنے کیلئے ایک مشترکہ روڈ میپ تیار کرتی ہیں۔
کانفرنس کا مرکزی موضوع ”وکست بھارت کے لیے انسانی سرمایہ“ ہے، جس کے تحت ریاستوں اور مرکز کے زیرِ انتظام علاقوں کے لیے بہترین طریقہئ کار اور حکمتِ عملی پر غوروخوض کیا جا رہا ہے۔ اس موضوع کے تحت پانچ اہم شعبوں پر تفصیلی گفتگو پر خصوصی زور دیا جا رہا ہے، جن میں ابتدائی تعلیم، اسکولی تعلیم، ہنرمندی کی تربیت، اعلیٰ تعلیم، کھیل کود اور غیر نصابی سرگرمیاں شامل ہیں۔ کانفرنس میں چھ خصوصی اجلاس بھی منعقد کیے جا رہے ہیں، جن میں ریاستوں میں ضابطہ جاتی اصلاحات، حکمرانی میں ٹیکنالوجی اور مواقع، خطرات اور ان کے تدارک کے طریقے، اسمارٹ سپلائی چینز اور مارکیٹ روابط کیلئے ایگری اسٹیک، ایک ریاست، ایک عالمی معیار کی سیاحتی منزل، آتم نربھر بھارت اور سودیشی، نیز بائیں بازو کی انتہا پسندی کے بعد کے دور کیلئے حکمتِ عملی شامل ہیں۔x
