بھارت اور روس نے آج دفاع، تجارت، صحت، تعلیم، ثقافت اور میڈیا سے متعلق شعبوں میں 16 سمجھوتوں کا تبادلہ کیا۔ نئی دلّی میں 23 ویں بھارت-روس سالانہ سربراہ میٹنگ میں روس کے صدر ولادیمیر پوتن کے ساتھ مشترکہ پریس کانفرنس سے خطاب کرتے ہوئے وزیراعظم نریندر مودی نے اِس اعتماد کا اظہار کیا کہ بھارت اور روس کی دوستی، عالمی چیلنجوں کا مقابلہ کرنے کیلئے طاقت فراہم کرے گی اور یہی باہمی اعتماد دونوں ممالک کے مشترکہ مستقبل کو مزید مضبوط بنائے گا۔ انہوں نے کہا کہ بھارت اور روس دہشت گردی کے خلاف لڑائی میں شانہ بشانہ کھڑے رہے ہیں۔

یوکرین کے مسئلے پر وزیراعظم نے کہا کہ بھارت نے اِس معاملے پر شروع سے ہی امن قائم کرنے کی وکالت کی ہے۔

انہوں نے اِس مسئلے کے پُر امن اور دیرپا حل کیلئے کی جانے والی تمام کوششوں کا خیرمقدم کیا۔

وزیراعظم نے کہا کہ دونوں ممالک یوریشیائی اقتصادی یونین کے ساتھ آزادنہ تجارتی معاہدے کو جلد از جلد حتمی شکل دینے کی کوشش کر رہے ہیں۔ جناب مودی نے اعلان کیا کہ بھارت جلد ہی روسی شہریوں کیلئے 30 روزہ مفت ای-ٹورِسٹ ویزا اور 30 روزہ گروپ ٹورِسٹ ویزا شروع کرے گا۔ انہوں نے مزید کہا کہ روس نے انٹرنیشنل Big Cats Alliance میں شامل ہونے کیلئے فریم ورک معاہدہ اپنانے کا فیصلہ کیا ہے۔