نائب صدر جمہوریہ سی پی رادھاکرشنن آج سیشلز کے دو روزہ دورے پر روانہ ہوں گے۔ وہ سیشلز کے نو منتخب صدر ڈاکٹر پیٹرک ہرمنی کی حلف برداری کی تقریب میں شرکت کریں گے۔ وزارتِ خارجہ نے ایک بیان میں کہا ہے کہ اپنے دورے کے دوران نائب صدر، ڈاکٹر ہرمنی کو بھارت کی جانب سے مبارکباد پیش کریں گے اور دونوں ممالک کے درمیان قریبی، دیرینہ اور وقت کی کسوٹی پر کھرے اترے تعلقات کو مزید مستحکم کریں گے۔ سیشلز، بھارت کے مہاساگر نظریے کے تحت ایک اہم شراکت دار ملک ہے۔ ان کا یہ دورہ اس بات کی عکاسی کرتا ہے کہ بھارت، سیشلز کے ساتھ اپنی شراکت داری کو مزید مستحکم اور وسیع کرنے کیلئے پُرعزم ہے۔