بھارت کا 44 واں بین الاقوامی تجارتی میلا آج سے نئی دلّی کے بھارت منڈپم میں شروع ہوگا۔ کامرس اور صنعت کے وزیر مملکت جتن پرساد شام کو ساڑھے پانچ بجے تجارتی میلے کا افتتاح کریں گے۔ اِس سال کے تجارتی میلے کا خاص موضوع ہے: ”ایک بھارت شریشٹھ بھارت“۔
اترپردیش، راجستھان، مہاراشٹر اور بہار اِس بین الاقوامی تجارتی میلے کیلئے شراکت دار ریاستیں ہیں جبکہ جھارکھنڈ، خصوصی توجہ والی ریاست ہوگی۔
اِس 14 روزہ تجارتی میلے میں 12 ملک شرکت کر رہے ہیں۔ اِن میں متحدہ عرب امارات، چین، ایران، جنوبی کوریا اور مصر شامل ہیں۔
آکاشوانی نیوز سے بات کرتے ہوئے تجارتی فروغ سے متعلق بھارتی تنظیم ITPO کے ایگزیکیوٹیو ڈائریکٹر Premjit Lal نے بتایا کہ اِس تجارتی میلے میں تقریباً 30 ریاستیں اور مرکز کے زیر انتظام علاقے نیز 60 سے زیادہ وزارتیں شرکت کر رہی ہیں۔ تجارتی میلے کے پہلے 5 دن کاروباری زمرے کیلئے محفوظ رکھے گئے ہیں اور یہ میلا اِس ماہ کی 19 تاریخ کو عام لوگوں کیلئے کھولا جائے گا۔ سینئر سٹیزن اور معزور افراد کیلئے داخلہ مفت ہوگا۔
انھوں نے یہ بھی کہا کہ اِس میں ساڑھے تین ہزار نمائش کاروں کے حصہ لینے کی امید ہے۔ تجارتی میلے میں آنے والے لوگوں کی سہولت کیلئے خصوصی انتظامات کیے گئے ہیں۔
تجارتی میلے کے ٹکٹ ITPOکی ویب سائٹ، دلی میٹرو کے 55 اسٹیشنوں اور دلی میٹرو کی ‘Saarthi’ ایپ سے خریدے جا سکتے ہیں۔ تجارتی میلے کے اوقات صبح 7 بجے سے شام ساڑھے سات بجے تک رہیں گے البتہ میلے میں جانے کے خواہشمند لوگ شام 5 بجے تک تجارتی میلے میں داخل ہوسکتے ہیں۔