مرکزی کابینہ نے آج شاہراہوں سے متعلق دو پروجیکٹوں، مہاراشٹر میں چھ لین والے ناسک- شولاپور کاریڈور اور اڈیشہ میں واقع قومی شاہراہ NH-326 کی توسیع کرنے اور مستحکم بنانے کی منظوری دی ہے۔ اقتصادی امور کی کابینہ کمیٹی نے ریاستِ مہاراشٹر میں گرین فیلڈ رسائی والی چھ لین والی ناسک- شولاپور- Akkalkot کاریڈور کی تعمیر کی منظوری دی ہے۔ 374 کلومیٹر طویل اِس شاہراہ کی کُل لاگت 19 ہزار 142 کروڑ روپے ہوگی۔
نئی دلّی میں میڈیا کو جانکاری فراہم کرتے ہوئے، اطلاعات و نشریات کے وزیر اشونی ویشنو نے کہا کہ یہ پروجیکٹ خطے کے اہم شہروں ناسک، اہلیہ نگر، شولاپور کو کرنول سے بہتر رابطہ فراہم کرے گا۔
یہ بنیادی ڈھانچہ پی ایم گتی شکتی نیشنل ماسٹر پلان کے اصول کے تحت ٹرانسپورٹ کے مربوط بنیادی ڈھانچہ کی ترقی کی جانب ایک اہم قدم ہے۔ اس چھ لین والے گرین فیلڈ کاریڈور سے سفر کے مجموعی وقت میں تقریباً 17 گھنٹے کی کمی آئے گی۔
حکومت نے اڈیشہ میں قومی شاہراہ NH-326 کی موجودہ دو لین کو توسیع دینے اور مضبوط بنانے کی بھی منظوری دی ہے۔ تقریباً 206 کلومیٹر طویل اس پروجیکٹ کی کل لاگت ایک ہزار 526 اعشاریہ دو ایک کروڑ روپے ہے۔ جناب ویشنو نے کہا کہ NH-326 کی جدید کاری سے سفر مزید تیز، محفوظ اور قابلِ اعتماد ہوگا، جس کے نتیجے میں جنوبی اڈیشہ کی ہمہ جہت ترقی ہوگی۔
جناب ویشنو نے کہا کہ اقتصادی سرگرمیوں میں اضافے کے سبب اس پروجیکٹ سے Gajapati، Rayagada اور Koraput کے امنگوں والے اور قبائلی اضلاع کو کافی فائدہ پہنچے گا۔ انہوں نے کہا کہ اس پروجیکٹ سے رائے پور- وشاکھاپٹنم کاریڈور سمیت اہم قومی راہداریوں کو براہِ راست کنیکٹیویٹی فراہم ہوگی اور ساز و سامان کو گوپال پور بندر گاہ اور آس پاس کے صنعتی مراکز تک لانے اور لے جانے میں سہولت ہوگی۔ سڑکوں کے بہتر رابطے سے مقامی برادریوں، صنعتوں، تعلیمی اداروں اور سیاحتی مراکز کو منڈیوں، صحت کے سہولتی مراکز اور روزگار کے مواقع تک بہتر رسائی حاصل ہوگی، جس سے خطے کو براہِ راست فائدہ پہنچے گا۔