لوک سبھا میں کل انتخابی اصلاحات اور ووٹر فہرستوں پر خصوصی تفصیلی نظرثانی SIR کے معاملے پر زوردار بحث ہوئی۔ مرکزی وزیر داخلہ امت شاہ نے اپوزیشن کو سخت تنقید کا نشانہ بناتے ہوئے اُن پر اپنے ووٹ بینک کی خاطر غیر قانونی تارکین وطن کو تحفظ فراہم کرنے کا الزام لگایا۔ انہوں نے کہا کہ درانداز یہ طے نہیں کر سکتے کہ ملک میں وزیر اعظم یا  وزیر اعلیٰ کون ہوگا۔

جناب امت شاہ نے زور دے کر کہا کہ SIR کا مقصد Duplicate ناموں اور غیر قانونی تارکین وطن کا نام ہٹا کر ووٹر فہرستوں کو درست کرنا ہے۔

انہوں نے یہ بھی کہا کہ ہو سکتا ہے کسی حقیقی غلطی کی وجہ سے ایک شخص کا نام کئی جگہوں پر ہو، لیکن اگر یہ سلسلہ اسی طرح جاری رہتا ہے تو اس سے انتخابات کی ساکھ پر اثر پڑے گا۔

وسیع تر مضمرات کو اُجاگر کرتے ہوئے جناب امت شاہ نے یہ تنبیہ کی کہ آبادی کے تناسب میں جوڑتوڑ کے ذریعے ملک کو ایک بار پھر بانٹنے کی اجازت نہیں دی جا سکتی۔ انہوں نے بنگلہ دیش سے متصل 2 ہزار 216 کلو میٹر طویل سرحد پر دراندازی کا سلسلہ جاری رہنے کو اُجاگر کیا اور ترنمول کانگریس اور کانگریس جیسی پارٹیوں پر الزام لگایا کہ وہ دراندازوں کا تحفظ کرنے کی سیاست کر رہی ہیں۔ساتھ ہی انہوں نے یہ بھی کہا کہ چناؤ کے وقت یہ پارٹیاں رائے دہندگان کے سامنے جوابدہ  ہوں گی۔ ×