لوک سبھا میں آج انتخابی اصلاحات پر آگے بحث ہوگی۔ کَل بحث میں حصہ لیتے ہوئے قانون اور انصاف محکمے کے وزیر ارجن رام میگھوال نے کہا کہ ووٹر فہرستوں پر خصوصی تفصیلی نظرِ ثانی SIR کا عمل کانگریس کے دورِ حکومت میں بھی کئی بار انجام دیا گیا، لیکن اب اپوزیشن اِس عمل پر سوال اٹھا رہی ہے۔

جناب میگھوال نے ملک کے ووٹنگ نظام کی یہ کہتے ہوئے ستائش کی کہ آزادی کے بعد سے ہر ایک کو ووٹنگ کے برابر کے حقوق ملتے رہے ہیں۔ وزیر موصوف نے کہا کہ انتخابات، محض ایک سیاسی عمل نہیں بلکہ یہ جمہوریت کا ایک فیسٹِول ہے، جسے کروڑوں لوگ اِس میں شامل ہوکر مناتے ہیں۔

لوک سبھا میں اپوزیشن کے لیڈر اور کانگریس کے رہنما راہل گاندھی نے انتخابی اصلاحات پر اظہارِ خیال کرتے ہوئے ووٹر فہرستوں میں Duplicate ووٹرس کا معاملہ اٹھایا۔ انھوں نے بہار میں SIR کے معاملے پر یہ الزام لگاتے ہوئے انتخابی کمیشن پر سوال اٹھایا کہ ووٹر فہرست میں ایک لاکھ 20 ہزار Duplicate فوٹو موجود ہیں۔