صدر جمہوریہ دروپدی مرمو نے آج اپنے قیام کے محض چھ سال کے دوران بالخصوص پانچ قبائلی گاؤوں کو اپنا کر اور بہتر بنیادی طبی خدمات کو یقینی بناکر قبائلی علاقوں میں حفظانِ صحت کے نظام کو بہتر بنانے کے اپنے عزم کیلئے ایمس دیو گھر کی ستائش کی۔ محترمہ دروپدی مرمو، جھارکھنڈ کے دیو گھر ضلعے میں ایمس دیو گھر کے پہلے جلسۂ تقسیمِ اسناد سے خطاب کر رہی تھیں۔ انھوں نے دور دراز کے علاقوں میں رہائش پذیر قبائلی لوگوں کو دواؤں کی فراہمی کیلئے ڈرون ٹیکنالوجی کے اختراعی استعمال کی ستائش کی اور صحتِ عامہ سے وابستہ مشاورتی خدمات کے سلسلے میں اُس کی کوششوں کو سراہا۔ پائیدار ترقیاتی اہداف کی اہمیت کو اجاگر کرتے ہوئے صدر جمہوریہ نے طلباء، اساتذہ اور حفظانِ صحت کے پیشہ ور افراد پر زور دیا کہ وہ طے شدہ وقت کے اندر قومی اور ریاستی سطح پر مقرر کردہ صحت اہداف کو حاصل کرنے کیلئے ملکر کام کریں۔