شہری ہوا بازی کے مرکزی وزیر رام موہن نائیڈو کنجاراپو نے کہا ہے کہ احمدآباد میں ہوائی جہاز کے گِر کر تباہ ہونے سے متعلق، ہوائی جہازوں کے حادثے کی تحقیقاتی بیورو کی ابتدائی رپورٹ پر مبنی کسی بھی فیصلے تک پہنچنا سمجھداری نہیں ہوگی۔ جب تک حتمی رپورٹ نہیں آجاتی اُس وقت تک کوئی بھی رائے ظاہرکرنا اچھی بات نہیں ہے۔ غازی آباد کے ہنڈن سول ٹرمنل سے دس نئی کمرشیل پروازوں کا افتتاح کرتے ہوئے مرکزی وزیر موصوف نے مغربی میڈیا کی سرزنش کی اور کہا کہ وہ جس طرح کے مضامین شائع کرنے کی کوشش کر رہے ہیں، ہوسکتا ہے اُن میں اُن کے مفادات چھپے ہوں۔ انھوں نے بھارت میں ہی بلیک باکس کو ڈی کوڈ کرنے کیلئے AAIB کی ستائش کی۔
مرکزی وزیر موصوف نے کہا کہ ہنڈن ٹرمنل سے ملک کے دس بڑے شہروں کیلئے براہِ راست فضائی خدمات کا آج آغاز ہوچکا ہے۔ اِن میں بنگلورو، کولکتہ، وارانسی، اِندور، چنئی، احمدآباد، پٹنہ، گوا اور ممبئی شامل ہیں۔
یہ تمام پروازیں اب غازی آباد سے براہِ راست دستیاب ہوں گی اور علاقے کے مسافروں کو اب دلّی ایئرپورٹ پر انحصار نہیں کرنا پڑے گا۔