شہری ہوابازی کے وزیر رام موہن نائیڈو نے شہری ہوابازی کی وزارت میں قائم کنٹرول روم کو انڈیگو کی پروازوں کے رد ہونے اور تاخیر سے پیدا ہونے والی غیر معمولی صورتحال پر مسلسل نظر رکھنے کی ہدایت دی ہے۔ وزیر موصوف نے آج صبح کنٹرول روم کا دورہ کیا اور اُس کے کام کاج کا جائزہ لیا، تاکہ بالخصوص مسافروں کو بروقت معلومات فراہم کرنے کیلئے تمام متعلقہ فریقوں کے درمیان موثر رابطے کو یقینی بنایا جاسکے۔ تمام ہوائی اڈوں سے ملنے والی تازہ ترین معلومات کی نگرانی کی جارہی ہے تاکہ مناسب ردعمل اور وسائل کی مؤثر تعیناتی کو یقینی بنایا جاسکے، خاص طور پر ان مسافروں کی سہولت کے لیے جو مختلف ٹرمینلز پر پھنسے ہوئے ہیں۔