آج سپریم کورٹ نے ملک بھر میں چائلڈ ٹریفکنگ سے متعلق معاملات کی روک تھام اور اُن سے متعلق مقدمات میں تیزی لانے کیلئے سخت رہنما خطوط جاری کیے ہیں۔ جسٹس جے بی پاردی والا اور آر مہا دیون پر مشتمل بینچ نے ملک بھر کے ہائی کورٹس کو بھی حکم دیا ہے کہ وہ چائلڈ ٹریفکنگ سے متعلق معاملات کے مقدمات، 6 مہینے کے اندر اندر مکمل کرنے کی ذیلی عدالتوں کو ہدایات جاری کریں۔ عدالت عالیہ نے اترپردیش سے چائلڈ ٹریفکنگ کے ایک معاملے میں ملزم کی جانب سے پیشگی ضمانت کی درخواست پر سماعت کے دوران یہ ہدایات جاری کیں۔ عدالت نے چائلڈ ٹریفکنگ کے معاملات سے نمٹنے میں اترپردیش حکومت اور اُس کے ملزم کو ضمانت دینے پر الٰہ آباد ہائی کورٹ کی تنقید کی۔
ایک اہم حکم نامے میں عدالت نے کہا ہے کہ اگر ایک اسپتال سے ایک نوزائیدہ بچہ چوری ہوجاتا ہے تو پہلا قدم متعلقہ اسپتال کے لائسنس کو منسوخ کرنا ہونا چاہیے۔ یہ معاملہ، لڑکے کے خواہشمند ایک جوڑے کو چوری کیا ہوا بچہ دیئے جانے سے متعلق ہے۔