سپریم کورٹ نے آج انتخابی کمیشن کو ہدایت دی ہے کہ وہ آدھار کارڈ کو 12 ویں دستاویز کے طور پر تسلیم کرے تاکہ بہار میں ووٹر فہرستوں کی خصوصی تفصیلی نظرثانی SIR میں نام شامل کرنے کیلئے، اِسے شناختی ثبوت کے طور پر پیش کیا جاسکے۔ اس کا مطلب یہ ہے کہ ووٹر فہرست میں نام درج کرانے کیلئے اب آدھار کارڈ کو ایک علیحدہ اور مکمل دستاویز کے طور پر جمع کرایا جاسکتا ہے۔ تاہم عدالت عالیہ نے اپنے حکم میں یہ بھی واضح کیا کہ آدھار کارڈ شہریت کا ثبوت نہیں ہے۔ بہار میں ووٹر فہرست کی خصوصی نظر ثانی SIR کے معاملے کی سماعت کے دوران عدالت عالیہ نے انتخابی کمیشن سے کہا کہ وہ زمینی سطح پر موجود اپنے اہلکاروں کو آدھار کارڈ کے قبول کیے جانے کے بارے میں ہدایت جاری کرے۔