شہری ہوا بازی کے وزیر رام موہن نائیڈو نے کہا ہے کہ ہوائی جہازوں کے حادثوں سے متعلق جانچ بیورو شفاف طریقے سے AI-171 طیارہ گرنے کے واقعہ کی تحقیقات کررہا ہے۔ جناب نائیڈو نے کہا کہ یہ عمل متعلقہ بین الاقوامی ماہرین اور متعلقہ اہلکاروں کو شامل کرکے بین الاقوامی معیارات کے عین مطابق انجام دیا جا رہا ہے۔آج راجیہ سبھا میں سوالوں کے وقفے کے دوران ضمنی سوالوں کا جواب دیتے ہوئے وزیر موصوف نے کہا کہ ابتدائی مرحلے کی چھان بین مکمل ہوگئی ہے اور ایک ابتدائی رپورٹ پیش کی گئی ہے۔
جناب رام موہن نائیڈو نے کہا کہ انہوں نے نہ صرف بھارتی میڈیا بلکہ مغربی ملکوں کے میڈیا میں بھی ایسے کئی مضامین دیکھے ہیں، جن میں خود اپنے نقطہ نظر کو بڑھاوا دینے کی کوشش کی گئی ہے۔ وزیر موصوف نے کہا کہ سرکار چاہتی ہے کہ وہ سچائی کے ساتھ کھڑی رہے اور تحقیقات مکمل ہونے کے بعد ہی اس کا انکشاف کیا جائے گا۔