راجستھان کے جئے پور میں ڈمپر کے المناک حادثے میں مہلوکین کی کی تعداد 14 ہوگئی ہے جبکہ 5 افراد شدید طور پر زخمی ہیں اور ان کا علاج جئے پور کے SMS اسپتال میں کیا جارہا ہے۔
یہ حادثہ آج صبح Sikar سڑک پر اُس وقت پیش آیا جب ایک تیز رفتار ڈمپر ٹرک کی بے قابو ہوکر موٹر گاڑیوں سے شدید ٹکر ہوگئی۔ یہ حادثہ اتنا شدید تھا کہ کئی گاڑیاں مکمل طور پر تباہ ہوگئیں۔ پولیس نے ڈرائیور کو گرفتار کرلیا۔ بتایا جاتا ہے کہ حادثے کے وقت وہ شراب کے نشے کے زیر اثر تھا۔ وزیر اعلیٰ بھجن لال شرما نے انسانی جانوں کے نقصان پر گہرے دُکھ کا اظہار کیا ہے اور اہلکاروں کو زخمیوں کو بہترن ممکنہ طبی خدمات فراہم کرنے کی ہدایت کی ہے۔حکام نے حادثے کی حقیقی وجوہات کا پتہ لگانے کیلئے تحقیقات شروع کری ہیں جبکہ پورا شہر حالیہ عرصے میں خونیں سڑک حادثات میں سے ایک کے سبب صدمے میں ہے۔ وزیر اعلیٰ نے ریاست میں بڑھتے ہوئے سڑک حادثات کا جائزہ لینے کیلئے اعلیٰ سطحی میٹنگ طلب کی ہے۔
صدر جمہوریہ دروپدی مرمو، نائب صدر سی پی رادھا کرشنن اور وزیراعظم نریندر مودی نے راجستھان کے جے پور میں حادثے میں انسانی جانوں کے نقصان پر دُکھ کا اظہار کیا ہے۔ سوشل میڈیا کی ایک پوسٹ پر صدر جمہوریہ نے انتہائی تکلیف پہنچانے والے اِس حادثے میں جان گنوانے والے کنبوں کے تئیں تعزیت کا اظہار کیا اور زخمیوں کی جلد صحت یابی کی دعا کی۔ نائب صدر سی پی رادھا کرشنن نے اِس حادثے کو المناک قرار دیا اور کہا کہ دُکھ کی اِس گھڑی میں وہ متاثرین کے کنبوں کے تئیں تعزیت کا اظہار کرتے ہیں۔ وزیراعظم نریندر مودی نے وزیر اعظم کے قومی امدادی فنڈ سے مہلوکین کے ہر کنبے کو دو-دو لاکھ روپئے کی نقد امداد کا بھی اعلان کیا ہے۔ زخمیوں کو پچاس-پچاس ہزار روپئے دیئے جائیں گے۔جناب مودی نے زخمیوں کی جلد صحت یابی کی بھی دعا کی۔