بی جے پی نے ووٹر فہرستوں کی خصوصی جامع نظرثانی کے عمل پر مبینہ طور پر تذبذب پیدا کرنے پر کانگریس کی آج نکتہ چینی کی۔
نئی دلّی میں ایک پریس کانفرنس سے خطاب کرتے ہوئے پارٹی ترجمان سمبت پاترا نے کہا کہ انتخابی اصلاحات پر تفصیلی تبادلۂ خیال پارلیمنٹ میں ہوچکا ہے۔ انھوں نے مزید کہا کہ اِس تبادلۂ خیال کے دوران مرکزی وزیر داخلہ امت شاہ نے اپوزیشن کی جانب سے اٹھائے گئے تمام سوالوں کا نکتہ بہ نکتہ جواب دیا ہے۔ جناب پاترا نے الزام لگایا کہ کانگریس، بھارت کے آئینی اداروں کی بے حرمتی کر رہی ہے۔ انہوں نے کہا کہ بھارت کی جمہوریت کی طاقت، سب کو اچھی طرح معلوم ہے۔
اُدھر کانگریس پارٹی نے چناؤ معاملوں پر آج دلّی کے رام لیلا میدان میں ایک ریلی کی۔ پارٹی صدر ملکارجن کھڑگے اور راہل گاندھی سمیت پارٹی کے اعلیٰ رہنماؤں نے اجتماع سے خطاب کیا۔