بہار ملک کی ایسی پہلی ریاست بن گئی ہے، جہاں ہر پولنگ مرکز پر ایک ہزار 200 سے کم ووٹرس اپنے حق رائے دہی کا استعمال کریں گے۔ کَل اس کا اعلان کرتے ہوئے چناؤ کمیشن نے کہا کہ اس اقدام کا مقصد لوگوں کی لمبی قطاروں کو کم کرنا اور پولنگ کے عمل کو اور زیادہ آسان بنانا ہے۔ اس مقصد کو حاصل کرنے کیلئے ریاست بھر میں 12 ہزار 817 نئے پولنگ مراکز کا اضافہ کیا گیا ہے۔ اس سے قبل ایک پولنگ مرکز پر ایک ہزار 500 رائے دہندگان کی زیادہ سے زیادہ حد تھی، جس کو ووٹر فہرست کی خصوصی نظرثانی مہم SIR کے تحت کم کرکے ایک ہزار 200 کردیا گیا ہے۔ پولنگ مراکز میں اس اضافے کے ساتھ ہی بہار میں پولنگ اسٹیشنوں کی کُل تعداد اب 77 ہزار 895 سے بڑھ کر 90 ہزار 712 ہوگئی ہے۔

چناؤ کمیشن نے کہا کہ ریاست میں جاری ووٹر فہرستوں کی خصوصی نظرثانی مہم کے تحت اب تک 7 کروڑ 16 لاکھ سے زیادہ فارم جمع کرائے جاچکے ہیں۔ چناؤ کمیشن نے مزید کہا کہ اگلے مہینے کی پہلی تاریخ سے عوام میں سے کوئی بھی شخص   ووٹر فہرستوں کے مسودے میں کسی بھی قسم کے اضافے، حذف اور ترمیم کیلئے اعتراضات درج کراسکتا ہے۔×