بھارت اور افغانستان نے دو طرفہ تجارت اور کنیکٹیوٹی میں اضافے کیلئے کابل کو دلّی اور امرتسر سے جوڑنے والی مال برداری کی فضائی راہداری شروع کرنے کا اعلان کیا ہے۔ اِس پہل کا مقصد دونوں ملکوں کے درمیان ضروری اشیاء کی حمل و نقل میں آسانی پیدا کرنا اور معاشی تعلقات کو تقویت دینا ہے۔ یہ فیصلہ، افغانستان کے صنعت اور کامرس کے وزیر الحاج نور الدین عزیزی کے ایک ہفتہ طویل بھارت دورے کے آج ہوئے اختتام پر لیا گیا۔ وزارت خارجہ نے اپنے بیان میں بتایا کہ دورے کے دوران وزیر عزیزی نے وزیر خارجہ ڈاکٹر ایس جے شنکر سے ملاقات کی۔ دونوں وزیروں نے دو طرفہ تعلقات، کنیکٹیوٹی اور عوام سے عوام تبادلوں پر بات چیت کی۔ وزیر عزیزی نے کامرس اور صنعتوں کے وزیر پیوش گوئل کے ساتھ وفد کی سطح کی بات چیت بھی کی۔ اس دوران دونوں نے تجارت میں آسانی، بازار تک رسائی، کنیکٹیوٹی اور صلاحیت سازی سمیت وسیع تر معاملوں پر تبادلۂ خیال کیا۔