بھارتی ساحلی محافظ دستے ICG کے ملک میں ہی ڈیزائن اور تیار کردہ آلودگی پر قابو پانے والے پہلے جہاز سمُدر پرتاپ کو آج گوا میں وزیر دفاع راجناتھ سنگھ پانی میں اُتاریں گے۔ 114 اعشاریہ 5 میٹر طویل اس جہاز میں 60 فیصد سے زیادہ گھریلو ساخت کا ساز و سامان استعمال کیا گیا ہے۔ 4 ہزار 200 ٹن وزنی یہ جہاز، 22 بحری میل سے زیادہ رفتار رکھنے کی صلاحیت رکھتا ہے اور اس کی آپریشنل حد 6 ہزار بحری میل ہے۔ یہ جہاز سمندری آلودگی پر قابو پانے کے ضابطوں کے نفاذ، سمندری قوانین کے نفاذ، تلاش اور بچاؤ کی کارروائیوں اور بھارت کے خصوصی اقتصادی زون کے تحفظ کیلئے ایک اہم پلیٹ فارم کے طور پر خدمات انجام دے گا۔ اس جہاز کو دسمبر میں باضابطہ طور پر گوا شپ یارڈ لمیٹڈ نے بھارتی ساحلی محافظ دستے کے سپرد کیا تھا۔

اس جہاز کی بحریہ میں شمولیت ایسے وقت ہو رہی ہے، جب ساحلی محافظ دستے کی جانب سے سمندری نگرانی میں اضافہ کیا گیا ہے۔ سمُدر پرتاپ کی شمولیت کے ساتھ بھارتی ساحلی محافظ دستہ اپنی آپریشنل تیاری کو مزید مضبوط بنا رہا ہے۔ اس سے سمندری سکیورٹی، ماحولیاتی تحفظ اور گھریلو دفاعی پیداوار کے تئیں بھارت کے عزم کو بھی تقویت ملتی ہے۔

مرکزی وزیر دفاع راجناتھ سنگھ کل گوا پہنچے، جہاں وہ دو روز کے اہم دورے پر ہیں۔ اُن کے اس دورے کا مقصد بھارت کی سمندری اور ماحولیاتی صلاحیتوں کو مضبوط بنانا ہے۔ گوا پہنچنے پر وزیر دفاع راجناتھ سنگھ کا پُر تپاک خیر مقدم کیا گیا۔ Dabolim کے مقام پر INS ہنسا پہنچنے پر پروٹوکول کے وزیر جناب Mauvin Godinho نے اُن کا شاندار استقبال کیا۔  وزیر دفاع راجناتھ سنگھ بھارتی ساحلی محافظ دستے ICG کے ملک میں ہی تیار کیے گئے آلودگی کو کنٹرول کرنے والے پہلے جہاز سمُدر پرتاپ کو گوا شپ یارڈ لمیٹڈ میں بحریہ میں شامل کریں گے۔