الیکٹرانکس اور انفارمیشن ٹکنالوجی کے وزیر اشونی ویشنو نے کہا ہے کہ صحت دیکھ بھال، تعلیم، زراعت، مینوفیکچرنگ، حکمرانی اور بنیادی ڈھانچے جیسے شعبوں میں مصنوعی ذہانت، AI کایا پلٹ کرنے والی قوت کے طور پر اُبھر رہی ہے۔ جے پور میں منعقد راجستھان ریجنل آرٹیفیشئل انٹیلی جنس امپیکٹ سمٹ سے ورچوئل طریقے سے خطاب کرتے ہوئے جناب ویشنو نے یہ بات کہی۔ انہوں نے کہا کہ AI صرف مستقبل کی ٹکنالوجی نہیں ہے، بلکہ انسانی زندگی اور کام کرنے کے طریقوں کو ترتیب دینے والا طاقتور وسیلہ ہے۔ جناب ویشنو نے اعلان کیا کہ عالمی AI امپیکٹ سمٹ اگلے مہینے بھارت میں منعقد ہوگا۔ انہوں نے کہا کہ ملک کی سبھی ریاستوں میں عالمی AI سمٹ اور علاقائی AI سمٹ سے متعلق تیاریاں جاری ہیں۔ جناب ویشنو نے کہا کہ اگلے سال تک 10 لاکھ نوجوان افراد اور چھوٹے کاروباری AI مہارتیں حاصل کر لیں گے۔