ایئر انڈیا اور انڈیگو سمیت ایئر لائنز نے حکومت مخالف احتجاج کے دوران کاٹھمنڈو ہوائی اڈہ بند ہونے کے پیش نظر دلّی اور کاٹھمنڈو کے درمیان اپنی پروازیں منسوخ کر دی ہیں۔ ایئر انڈیا نے ایک بیان میں کہا ہے کہ نیپال کے موجودہ حالات کے پیشِ نظر دلّی-کاٹھمنڈو-دلّی روٹ کی پروازیں آج کے لیے منسوخ کر دی گئی ہیں۔ ایئرلائن نے مزید کہا کہ وہ صورتحال پر قریبی نظر رکھے ہوئے ہے اور مزید تازہ جانکاری شیئر کرے گی۔ انڈیگو نے بھی اعلان کیا ہے کہ کاٹھمنڈو آنے اور جانے والی تمام پروازیں فی الحال معطل ہیں۔ ایئرلائن نے متاثرہ مسافروں کو اپنے سفر کی تاریخ تبدیل کرنے یا اُس کی آفیشیل ویب سائٹ کے ذریعے رقم واپس لینے کا مشورہ دیا۔ اس نے مسافروں سے مزید کہا ہے کہ تازہ ترین ایڈوائزری اور جانکاری کیلئے آفیشیل چینلوں پر نگاہ رکھیں۔