اعلیٰ انتخابی کمشنر گیانیش کمار نے، بہار میں آئندہ اسمبلی انتخابات کے لیے 17 نئے اقدامات شروع کرنے کا اعلان کیا ہے۔ پٹنہ میں ایک پریس کانفرنس سے خطاب کرتے ہوئے انہوں نے کہا کہ اِن میں سے کچھ اقدامات پر انتخابات کے دوران عمل کیا جائے گا، جبکہ کچھ کو گنتی کے دوران عمل میں لایا جائے گا۔
جناب کمار نے کہا کہ اِن اقدامات کا مقصد نہ صرف بہار میں انتخابی عمل کو بہتر بنانا ہے، بلکہ مستقبل میں ملک گیر سطح پر عمل درآمد کے لیے ایک مثالی طرزِ عمل بھی قائم کرنا ہے۔
اعلیٰ انتخابی کمشنر نے کچھ بنیادی اقدامات کا خاکہ پیش کیا، جن میں کام کاج کے نئے معیاری طور طریقے SOP شامل ہیں، جن کا مقصد ووٹر کے رجسٹریشن کے 15 دن کے اندر-اندر، الیکٹرو-فوٹو شناختی کارڈز کی فراہمی کو یقینی بنانا ہے۔
اس کے علاوہ ووٹنگ کے عمل کو بلارکاوٹ بنانے کے لیے پولنگ بوتھوں پر، موبائل جمع کرنے کی سہولت بھی فراہم کی جائے گی۔
بہار، ملک کی ایسی پہلی ریاست ہے، جہاں انتخابی کمیشن کے ایک اہم قدم کے مطابق، ہر ایک پولنگ اسٹیشن پر 1200 سے کم ووٹرز اپنے حقِ رائے دہی کا استعمال کریں گے، جس کا مقصد ووٹروں کی رسائی کو آسان بنانا اور قطاروں کی طوالت کو کم کرنا ہے۔
اعلیٰ انتخابی کمشنر نے یہ بات بھی خاص طور پر کہی کہ بہار، جہاں انتخابات ہونے والے ہیں، ایسی پہلی ریاست ہوگی، جہاں الیکٹرونک ووٹنگ مشین میں بیلٹس پر، بڑی تحریر لکھی ہوگی اور امیدواروں کے کلر فوٹوگرافس بھی ہوں گے، جبکہ اس کے لیے ابھی تک بلیک اینڈ وہائٹ تصویریں استعمال کی جاتی تھیں، جس کی وجہ سے انتخابی نشانات واضح ہونے کے باوجود اکثر امیدواروں کی شناخت مشکل ہو جاتی تھی۔
جناب کمار نے یہ بھی اعلان کیا کہ بہار میں سبھی پولنگ اسٹیشنوں پر مکمل طور پر ویب کاسٹنگ کی جائے گی، تاکہ انتخابی عمل کے دوران، اور زیادہ شفافیت قائم رہے۔×
