امریکہ نے اعلان کیا ہے کہ اُس نے یوکرین کے ساتھ اقتصادی شراکت داری کا ایک معاہدہ کیا ہے، جو واشنگٹن کو یوکرین کی تعمیر نو میں سرمایہ کاری کے لیے مشترکہ فنڈ کے بدلے کیف کی نایاب زمینی معدنیات تک رسائی کی اجازت دے گا۔ یوکرین کے قدرتی وسائل تک امریکہ کو رسائی فراہم کرنے کے معاہدے تک پہنچنے کے لیے واشنگٹن اور کیف پچھلے چند مہینوں سے سرگرم مذاکرات میں مصروف رہے ہیں۔
امریکہ کے محکمہئ خزانہ کی ایک پریس ریلیز میں کہا گیا ہے کہ دونوں ملکوں نے باہمی طور پر تعمیر نو کے لیے ایک سرمایہ کاری فنڈ قائم کرنے پر اتفاق کیا ہے۔ یہ فنڈ نئے قدرتی وسائل کے اجازت نامے سے یوکرین کو حاصل ہونے والے منافع اور رائلٹی کا 50 فیصد وصول کرے گا۔
مسودے میں کہا گیا ہے کہ امریکہ کو یوکرین کے قدرتی وسائل تک ترجیحی رسائی حاصل ہوگی، تاہم واشنگٹن کو کیف کی معدنیات کی دولت یا گیس کا کوئی بنیادی ڈھانچہ حاصل نہیں ہوگا۔x