اروناچل پردیش میں بلدیاتی اداروں کے انتخابات میں حکمراں BJP نے ضلع پریشدوں اور گرام پنچایتوں میں بیشتر سیٹیں جیت کر زبردست کامیابی حاصل کی ہے۔ اِن سیٹوں کیلئے چناؤ 15 دسمبر کو کرایا گیا تھا۔
BJP نے 20 وارڈوں میں سے 14 وارڈ جیت کر ایٹہ نگر میونسپل کارپوریشن کا چناؤ بھی فیصلہ کُن انداز سے جیتا ہے۔ البتہ پاسی گھاٹ میونسپل کونسل میں علاقائی پیوپلز پارٹی آف اروناچل آٹھ میں سے پانچ وارڈوں میں کامیابی حاصل کرکے فاتح رہی ہے، جبکہ BJP نے دو سیٹیں جیتی ہیں۔
اِدھر اپوزیشن کانگریس ایٹہ نگر اور پاسی گھاٹ دونوں ہی میونسپل کارپوریشنوں کے انتخابات میں ایک بھی سیٹ نہیں جیت سکی۔
اروناچل پردیش کے وزیراعلیٰ پیما کھانڈو نے پارٹی کی شاندار کامیابی کیلئے لوگوں کے تئیں تشکر کا اظہار کیا ہے۔ ریاست کے انتخابی کمیشن کے مطابق BJP کو 245 ضلع پریشد سیٹوں میں سے 170 سیٹوں پر کامیابی ملی ہے۔ اِن میں 59 سیٹیں بلا مقابلہ جیتی ہیں۔
پیوپلز پارٹی آف اروناچل 28 سیٹیں جیت کر دوسری سب سے بڑی پارٹی بن کر ابھری ہے، جبکہ کانگریس کو 7 سیٹیں ملی ہیں۔x
