آج پیغمبر اسلام حضرت محمد صلی اللہ علیہ وسلم کا یومِ ولادت عید میلاد النبی ملک کے مختلف حصوں میں مذہبی عقیدت کے ساتھ منایا جا رہا ہے۔ اِس موقع پر میلاد محفلوں اور سیرتِ پاک کے جلسوں کا اہتمام کیا گیا ہے، جس میں حضرت محمد صلی اللہ علیہ وسلم کی حیاتِ طیبہ اور تعلیمات کو اُجاگر کیا جائے گا۔ اس موقع پر میلاد کے جلوس بھی نکالے جارہے ہیں۔
صدر جمہوریہ دروپدی مرمو اور وزیر اعظم نریندر مودی نے آج عید میلادالنبی کے موقع پر لوگوں کو مبارکباد دی ہے۔ ایک سوشل میڈیا پوسٹ پر صدر جمہوریہ نے سبھی ہموطنوں، خاص طور پر مسلم برادری کو مبارکباد پیش کی ہے اور اِس بات کو اُجاگر کیا ہے کہ پیغمبر حضرت محمد صلی اللہ علیہ وسلم نے اتحاد اور انسانیت کی خدمت کا پیغام دیا تھا۔
اِدھر وزیر اعظم نریندر مودی نے ایک سوشل میڈیا پوسٹ پر یہ امید ظاہر کی ہے کہ اس تہوار سے معاشرے میں امن و سکون اور فلاح و بہبود کو فروغ حاصل ہوگا۔ جناب مودی نے کہا کہ رحمدلی، خدمت اور انصاف کی اقدار سے ہمیشہ سبھی کو رہنمائی حاصل ہوتی ہے۔