پنجاب میں تیز بارش ہونے سے پوری ریاست میں دریا طغیانی پر ہیں اور سیلاب کی صورتحال برقرار ہے۔ پوری ریاست میں سخت چوکسی برتنے کا اعلان کیا گیا ہے، کیونکہ مختلف باندھوں سے پانی چھوڑے جانے کے نتیجے میں پہلے ہی متاثرہ ضلعوں میں حالات مزید خراب ہوسکتے ہیں۔ اِن میں پٹیالہ، فاضلکا، امرتسر، گرداس پور، فیروز پور، کپورتھلہ اور بقیہ 17 ضلعے شامل ہیں۔
پنجاب میں سیلاب کی وجہ سے 30 افراد ہلاک ہوئے ہیں اور 3 لاکھ 54 ہزار افراد متاثر ہوئے ہیں۔ پوری ریاست میں 1 لاکھ 48 ہزار ہیک ٹیئر فصل تباہ ہو گئی ہے اور سینکڑوں مویشی ڈوب کر مرگئے ہیں۔ راحت اور بچاؤ کی کارروائیاں جنگی پیمانے پر جاری ہیں۔ سیلاب کی بگڑتی صورتحال کے پیش نظر ریاستی حکومت نے طلبا، اساتذا اور عملے کی حفاظت کو یقینی بنانے کے لیے 7 ستمبر تک سبھی تعلیمی اداروں کو بند کرنے کے احکامات جاری کیے ہیں۔ پنجاب کے گورنر گُلاب چند کٹاریہ بھی سیلاب سے متاثرہ اضلاع کا دورہ کر رہے ہیں اور متاثرہ افراد سے ملاقات کررہے ہیں۔