چھتیس گڑھ سے تعلق رکھنے والے نامور ہندی شاعر اور ادیب ونود کمار شکل کو ادب کیلئے بھارت کے اعلیٰ ترین اعزاز گیان پیٹھ ایوارڈ سے سرفراز کئے جانے کا اعلان کیا گیا ہے۔ یہ اعلان آج نئی دلّی میں کیا گیا۔
جناب ونود کمار شکل یکم جنوری 1947 کو راج نند گائوں میں پیدا ہوئے۔ وہ رائے پور میں رہتے ہیں اور تقریباً پچاس سال سے تصانیف تحریر کرتے رہے ہیں۔ اُن کی اہم تخلیقات میں شعری مجموعہ ’’لگ بھگ جئے ہند‘‘ اور ناول ’’نوکر کی قمیص‘‘، ’’کھِلے گا تو دیکھیں گے‘‘ اور ’’دیوار میں ایک کھڑکی‘‘ شامل ہیں۔
اُن کی مختلف کہانیوں اور نظموں کو کافی سراہا گیا۔ اِن میں ’’مہاودیالیہ‘‘، ’’وہ آدمی چلا گیا‘‘
اور ’’آکاش دھرتی کو کھٹکتا ہے‘‘ شامل ہیں۔
جناب ونود کمار شکل بچوں کی کتابیں بھی تحریر کرتے رہے ہیں اور اُن کی کتابوں کا مختلف زبانوں میں ترجمہ بھی کیا گیا ہے۔ اُنھیں ساہتیہ اکاڈمی ایوارڈ سمیت کئی اعزازات سے نوازا جاچکا ہے۔ گیان پیٹھ ایوارڈ دیئے جانے پر انھوں نے کہا کہ یہ اُن کیلئے بڑے اعزاز کی بات ہے جس سے ذمے داری کے اُن کے احساس کو اور تقویت ملی ہے۔
اِدھر چھتیس گڑھ کے وزیر اعلیٰ وشنو دیو سائی نے گیان پیٹھ ایوارڈ دیئے جانے کے اعلان پر جناب ونود کمار شکل کو مبارکباد دی ہے۔ انھوں نے کہا کہ یہ چھتیس گڑھ کیلئے بہت فخر کی بات ہے۔