زراعت اور کسانوں کی بہبود کے مرکزی وزیر شیوراج سنگھ چوہان نے کہا کہ مختلف سرکاری اسکیموں کا فائدہ حاصل کرنے کیلئے ہرکسان کو ڈیجیٹل شناختی کارڈ جاری کئے جائیں گے۔ جناب چوہان نے کہا کہ زراعت، ملک کی معیشت کی ریڑھ کی ہڈی ہے اور کسانوں کی بہبود، نریندر مودی حکومت کی ترجیح ہے۔ اپنی وزارت کی جانب سے سال 2025-26 کے مطالباتِ زر سے متعلق بحث کا جواب دیتے ہوئے جناب چوہان نے کہا کہ سال 2013-14 میں غذائی اجناس کی پیداوار لگ بھگ 265 ملین ٹن تھی جو اب بڑھ کر 330 ملین ٹن سے تجاوز کر گئی ہے۔ انھوں نے کہا کہ سال 2004 سے 2014 کے درمیان 45 کروڑ 90 لاکھ میٹرک ٹن دھان کی خریداری ہوئی تھی جبکہ مودی حکومت نے کم از کم امدادی قیمت پر اب تک 75 کروڑ 74 لاکھ میٹرک ٹن دھان کی خریداری کی ہے۔ وزیر زراعت نے کہا کہ پردھان منتری فصل بیمہ یوجنا اسکیم، غیر متوقع قدرتی آفات کی وجہ سے فصل کو نقصان پہنچنے کی صورت میں جامع تحفظ کی پیشکش کرتی ہے۔
اس کے بعد، لوک سبھا نے زراعت اور کسانوں کی بہبود کی وزارت کے سال 2025-26 کے مطالباتِ زر کو منظوری دے دی۔