بھارت نے امریکی صدر ڈونلڈ ٹرمپ کے اِس دعوے کی تردید کی ہے کہ انہوں نے یہ کہتے ہوئے بھارت اور پاکستان کے درمیان ممکنہ ٹکراؤ رکوایا ہے کہ وہ دونوں ملکوں کے ساتھ کافی تجارت کرنے جارہے ہیں۔

وزارت خارجہ کے ذرائع نے کہاکہ 9 مئی کو وزیراعظم نریندر مودی کے ساتھ امریکہ کے نائب صدر JD Vance کی بات چیت میں تجارت کا کوئی تذکرہ نہیں ہوا تھا۔ ذرائع نے بتایاہے کہ آپریشن سندور شروع ہونے کے بعد امریکہ کے وزیر خارجہ Marco Rubio نے 8 اور 10 مئی کو وزیرخارجہ ڈاکٹر ایس جے شنکر اور 10 مئی کو قومی سلامتی کے مشیر اجیت دوبھال سے فون پر بات کی تھی اور اِن میں سے کسی بھی گفتگو کے دوران تجارت کے موضوع پر کوئی بات نہیں ہوئی۔ امریکہ کے صدر ڈونلڈ ٹرمپ نے ایک پریس بریفنگ میں کہاتھاکہ انہوں نے بھارت اور پاکستان کو جنگ بندی پر راضی کرنے کیلئے اِن دونوں ملکوں کے ساتھ کافی تجارت کرنے کا وعدہ کیا تھا۔