राष्ट्रपती द्रौपदी मुर्मू यानी आज नवी दिल्ली इथं ‘वीर बाल दिना’निमित्त प्रधानमंत्री राष्ट्रीय बाल पुरस्कारांचे वितरण केलं. या वर्षी १८ राज्य आणि केंद्र शासित प्रदेशांतल्या मिळून २० मुलांना त्यांच्या उत्कृष्ट कामगिरीबद्दल सन्मानित करण्यात आलं आहे. या कार्यक्रमात राष्ट्रपती म्हणाल्या, पुरस्कार विजेत्या मुलांनी शौर्य, कला आणि संस्कृती, पर्यावरण, नाविन्यपूर्ण संशोधन, तसंच विज्ञान आणि तंत्रज्ञान यांसह विविध क्षेत्रांत असाधारण योगदान दिलं आहे.
दरम्यान, प्रधानमंत्री नरेंद्र मोदी हे देखील भारत मंडपम येथे वीर बाल दिनाच्या कार्यक्रमात मुलं आणि तरुणांना मार्गदर्शन करतील. प्रधानमंत्री राष्ट्रीय बाल पुरस्काराचे विजेतेदेखील या कार्यक्रमाला उपस्थित राहतील.
वीर बाल दिनानिमित्त सरकारने देशभरात लोकसहभागातून विविध कार्यक्रमांचं आयोजन केलं आहे. याद्वारे श्री गुरु गोबिंद सिंग जी यांचे धाकटे सुपुत्र साहिबजादे बाबा जोरावर सिंग जी आणि बाबा फतेह सिंग जी यांच्या असाधारण शौर्याची त्यांच्या त्यागाची माहिती दिली जाणार असून भारताच्या इतिहासातील बाल नायकांचे साहस, त्याग आणि पराक्रमाचा गौरव केला जाणार आहे.
या उपक्रमांमध्ये कथाकथन, काव्यवाचन, भित्तिपत्रक तयार करणे आणि निबंध लेखन स्पर्धांचा समावेश असेल. हे कार्यक्रम शाळा, बालसंगोपन संस्था, अंगणवाडी केंद्रे आणि इतर शैक्षणिक व्यासपीठांवर आयोजित केले जातील. श्री गुरु गोबिंद सिंग जी यांचे धाकटे सुपुत्र साहिबजादे बाबा जोरावर सिंग जी आणि बाबा फतेह सिंग जी यांच्या शौर्य आणि बलिदानाचा गौरव करण्यासाठी ‘वीर बाल दिन’ आयोजित केला जातो.
