तामिळनाडूत करूर झालेल्या चेंगराचेंगरीच्या दुर्घटनेची चौकशी करण्यासाठी तामिळनाडू सरकारने उच्च न्यायालयाच्या माजी न्यायाधीश अरुणा जगदीशन यांच्या चौकशी आयोगाची स्थापना केली आहे. अभिनेता आणि तमिळगा वेत्री कळघम या पक्षाचे संस्थापक विजय यांच्या स्वागतासाठी आयोजित केलेल्या एका रॅलीदरम्यान काल झालेल्या दुर्घटनेत ४० जण मृत्युमुखी पडले असून ८० जणांवर विविध रुग्णालयांमध्ये उपचार सुरू आहेत..
प्रधानमंत्री सहायता निधीतून मृतांच्या कुटुंबांना प्रत्येकी २ लाख तर जखमींना प्रत्येकी ५० हजार रुपयाची, तर तामिळनाडूचे मुख्यमंत्री एम के स्टॅलिन यांनी मृतांच्या कुटुंबांना दहा लाख रुपये, आणि अतिदक्षता विभागात उपचार घेत असलेल्यांना एक लाख रुपयांची मदत जाहीर केली आहे. दरम्यान, या मेळाव्याचे आयोजक विजय यांनीही या दुर्घटनेबद्दल तीव्र दुःख व्यक्त केलं असून मृतांच्या कुटुंबांना प्रत्येकी २० लाख रुपयांची मदत जाहीर केली आहे. करूरमधल्या काँग्रेस खासदार जोतिमणी यांनी सांगितलं की अशी दुर्घटना करूरसाठी अभूतपूर्व असून तमिळनाडू काँग्रेसनं मृतांच्या कुटुंबांना प्रत्येकी १ कोटी रुपये मदत जाहीर केली आहे.