तालिबान प्रशासनानं अफगाणिस्तानमधल्या सगळ्या पोलिओ लसीकरण मोहीमा थांबवल्या असल्याचं संयुक्त राष्ट्रसंघानं घोषित केलं आहे. संयुक्त राष्ट्रसंघाच्या वतीनं राबवली जाणार असलेली या महिन्यातली नियोजित पोलिओ लसीकरण मोहीम रद्द केली असल्याचं तालिबाननं ही मोहीम सुरु होण्याच्या बेतात असतानाच राष्ट्रसंघाला कळवलं आहे. ही मोहीम खंडित करण्याचं कारण मात्र तालिबाननं स्पष्ट केलेलं नाही.
अफगाणिस्तानमधल्या पोलिओ बाधितांची संख्या गेल्या तीन वर्षात आणखी वाढली आहे. अफगाणिस्तान आणि पाकिस्तान हे दोनच देश अर्धांगवायू तसंच प्राणघातक ठरू शकणाऱ्या अन्य रोगांचं निर्मूलन न झालेले देश असल्याचं संयुक्त राष्ट्रसंघाच्या सूत्रांनी म्हटलं आहे.