नैऋत्य मान्सून कर्नाटकात दाखल झाला आहे परिणामी कर्नाटकच्या किनारपट्टीवर मुसळधार पाऊस पडला आहे. मंगळुरू, पनंबूर आणि कारवार इथं सर्वाधिक पाऊस पडला. हवामान विभागानं किनारपट्टीवर रेड अलर्ट जारी केला आहे. दक्षिण कन्नड जिल्ह्यात, सतत पाऊस आणि सोसाट्याच्या वाऱ्यांमुळे झाडं उन्मळून पडली आहेत आणि विजेचे खांब खराब झाले आहेत. नेत्रावती, कुमारधारा आणि फाल्गुनी नद्यांच्या पाणी पातळीत मोठी वाढ झाली आहे.
उत्तर कन्नड जिल्ह्यात मुसळधार पाऊस आणि समुद्राच्या उंच लाटा उसळत असताना बाहेर पडणाऱ्या नागरिकांना सावधगिरी बाळगण्याचं आवाहन जिल्हा प्रशासनानं केलं आहे. मच्छिमारांना समुद्रात न जाण्याचा सल्ला देण्यात आला आहे. जिल्हा प्रशासनानं संकटात सापडलेल्या लोकांसाठी हेल्पलाइन क्रमांक सुरू केले आहेत.
चिकमंगळुरूमध्ये मुसळधार पावसानं सामान्य जीवन विस्कळीत झालं आहे. गेल्या २४ तासांत कावेरी नदीच्या उगमस्थानी असलेल्या बागमंडला इथं विक्रमी १६८ मिलिमीटर पाऊस पडला. २८५९ फूट क्षमतेचा हरंगी जलाशय जवळजवळ भरला आहे.