सरदार वल्लभभाई पटेल यांच्या दीडशेव्या जयंतीनिमित्त राज्यात सर्वत्र एकता दौड, पदयात्रांसह विविध कार्यक्रम आयोजित करण्यात आले होते. मंत्रालयात मुख्य सचिव राजेश कुमार यांनी पटेल यांच्या प्रतिमेला पुष्पहार करून अभिवादन केलं. तसंच दिवंगत माजी प्रधानमंत्री इंदिरा गांधी यांच्या पुण्यतिथीनिमित्त त्यांच्या प्रतिमेलाही पुष्पहार अर्पण करून अभिवादन केलं. नवी मुंबईत बेलापूर, रबाळे आणि नवी मुंबई महापालिका मुख्यालय इथं एकता दौडसह विविध कार्यक्रम आयोजित केले होते.
बुलढाणा जिल्ह्यात मलकापूर इथल्या एकता दौडला केंद्रीय क्रीडा राज्यमंत्री रक्षा खडसे यांच्या नेतृत्वात सुरुवात झाली. परभणी शहरात आज भाजपानं एकता दौड आयोजित केली होती. जिल्ह्याच्या पालकमंत्री मेघना बोर्डिकर यांनी एकता दौडचा प्रारंभ केला. वाशीम, यवतमाळमध्ये क्रीडा मंत्रालय, जिल्हा प्रशासन, पोलीस प्रशासन, राष्ट्रीय सेवा योजना, एनसीसी यांनी एकत्रितपणे युनिटी मार्चचं आयोजन केलं होतं.
छत्रपती संभाजीनगर इथं एकता पदयात्रा आयोजित केली होती. तिचा समारोप इतर मागासवर्ग मंत्री अतुल सावे यांच्या उपस्थितीत झाला. कोल्हापूर जिल्ह्यात एकता पदयात्रेत दांडपट्टा, काठीचे खेळ यांसह विविध खेळांची प्रात्यक्षिके करण्यात आली. नांदेड, सोलापूर, धुळे, जळगाव सांगली, सातारा, रत्नागिरी, बीड, तसंच अहिल्यानगरमधेही पोलीस आणि नागरिक एकता दौडमध्ये उत्स्फूर्त सहभागी झाले होते.
