ख्यातनाम शिल्पकार महाराष्ट्र भूषण राम सुतार यांच्या पार्थिवावर आज नोएडा इथल्या वैकुंठ स्मशानभूमीत शासकीय इतमामात अंत्यसंस्कार करण्यात आले. केंद्रीय सामाजिक न्याय राज्यमंत्री रामदास आठवले तसंच राज्य शासनाच्या वतीनं राजशिष्टाचार मंत्री जयकुमार रावल यांनी पुष्पचक्र अर्पण करून आदरांजली वाहिली.अंत्यसंस्कारापूर्वी सुतार यांचे पार्थिव त्यांच्या निवासस्थानी दर्शनासाठी ठेवण्यात आलं होतं. कला, सामाजिक, राजकीय क्षेत्रातील मान्यवरांनी आणि चाहत्यांनी त्यांच्या पार्थिवाचं अंत्यदर्शन घेतलं.
सुतार यांच्या निधनाबद्दल राष्ट्रपती द्रौपदी मुर्मू, उपराष्ट्रपती सीपी राधाकृष्णन, प्रधानमंत्री नरेंद्र मोदी यांच्यासह अनेक मान्यवरांनी तीव्र दुःख व्यक्त केलं आहे. सुतार यांनी साकारलेली शिल्पं पाहताना त्यांचं निश्चित स्मरण होईल, अशी भावना फडणवीस मुख्यमंत्री देवेंद्र फडणवीस यांनी व्यक्त केली आहे.
राम सुतार यांच्या निधनामुळं शिल्पकलेचा ‘कोहिनूर’ काळाच्या पडद्याआड गेल्याचं उपमुख्यमंत्री एकनाथ शिंदे आदरांजली वाहताना म्हणाले. राम सुतार यांच्या निधनामुळे शिल्पकलेच्या क्षेत्रातील भीष्माचार्य काळाच्या पडद्याआड गेले आहेत, अशा शब्दात उपमुख्यमंत्री अजित पवार यांनी श्रद्धांजली वाहिली आहे.
राम सुतार यांचं आज वयाच्या १०१ व्या वर्षी निधन झालं. युनिटी ऑफ स्टॅच्यू हे आंतरराष्ट्रीय दर्जाचं स्मारकाचं आरेखन त्यांनी केलं होतं. याखेरीज अनेक थोर व्यक्तींचे, त्यांच्या व्यक्तिमत्वाचे बारकावे दाखवणारे पुतळे सुतार यांनी उभारले होते. १९९९ मधे पद्मश्री, तर २०१६ पद्मभूषण सन्मान त्यांना प्रदान करण्यात आला होता. त्यांच्या कलेची प्रशंसा देशोदेशी झाली होती.
‘महाराष्ट्र भूषण पुरस्कार प्रदान करण्यात आला होता. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्यासह सांस्कृतिक कार्यमंत्री आशिष शेलार यांनी नोएडा इथल्या त्यांच्या निवासस्थानी जाऊन हा पुरस्कार प्रदान केला होता.
