प्रधानमंत्री नरेंद्र मोदी येत्या मंगळवार पासून दोन दिवसांच्या भूतान दौऱ्यावर जाणार आहेत. या दौऱ्यादरम्यान, मोदी आणि भूतानचे राजे जिग्मे खेसर नामग्याल वांगचुक, एक हजार वीस मेगावॅट क्षमतेच्या पुनात्सांगचु-२ या जलविद्युत प्रकल्पाचं उद्घाटन करतील. भारत आणि भूतान यांनी संयुक्तपणे हा प्रकल्प विकसित केला आहे. भूतानचे राजे जिग्मे सिंग्ये वांगचुक यांच्या ७० व्या जयंतीनिमित्त आयोजित समारंभात प्रधानमंत्री सहभागी होतील आणि भूतानचे प्रधानमंत्री त्शेरिंग तोबगे यांचीही भेट घेतील.
यावेळी जागतिक शांती प्रार्थना महोत्सवात प्रधानमंत्री मोदी सहभागी होणार असून थिंपूमधील ताशिचोडझोंग इथं भगवान बुद्धांच्या पवित्र अवशेषांच्या स्थळी प्रार्थना करणार आहेत.
दरम्यान, मोदी यांच्या भूतान भेटीच्या पार्श्वभूमीवर, भारतातून नेलेल्या भगवान बुद्धांच्या पवित्र अवशेषांचा एक भाग थिंपू इथला प्रमुख मठ, ताशिचोडझोंग इथं ठेवण्यात आला आहे. हा मठ भूतानच्या सर्वोच्च आध्यात्मिक आणि राजकीय संस्थांचं केंद्र मानला जातो. भारताचे सामाजिक न्याय आणि सक्षमीकरण मंत्री वीरेंद्र कुमार यांच्यासह भूतानचे प्रधानमंत्री त्शेरिंग तोबगे, इतर मंत्री आणि वरिष्ठ पदाधिकारी या कार्यक्रमात सहभागी झाले होते.
