युवकांची हीच निष्ठा हेच विकसित भारताचं सामर्थ्य असल्याचं प्रधानमंत्री नरेंद्र मोदी यांनी म्हटलं आहे. प्रधानमंत्र्यांनी आज आकाशवाणीवर मन की बात च्या माध्यमातून देशवासियांशी संवाद साधला. तीव्र इच्छा, सामूहिक शक्ती, आणि संघभावनेनं काम करण्यावर विश्वास तर कठीण कामातही यश मिळतं असं ते म्हणाले. या संदर्भात त्यांनी इस्त्रोनं मंगळ ग्रहासारख्या वातावरणात जीपीएस प्रणालीशिवाय ड्रोन उडवण्याची आयोजित केलेल्या स्पर्धेची, एक चित्रफित पाहिल्याचा अनुभव सामायिक केला. या स्पर्धेत पुण्यातल्या एका संघानं यश मिळवल्याचा उल्लेख त्यांनी केला.
हैदराबाद मध्ये स्कायरूटच्या इन्फिनिटी संकुलाच्या उद्घाटनानं भारताच्या अवकाश परिसंस्थेला नवी उंची गाठून दिली आहे. यातून नव्या भारताची मानसिकता आणि युवा शक्तीचं प्रतिबिंब उमटलं असल्याचं ते म्हणाले. हैदराबाद इथं विमानांच्या देखभाल, दुरुस्ती आणि संपूर्ण तपासणी केंद्राचं उद्घाटन, नौदलाच्या ताफ्यात स्वदेशी बनवटीच्या आयएनएस माहे या युद्धनौकेचा झालेला समावेशाचा उल्लेखही त्यांनी केला. आपलं नौदल आत्मनिर्भर होण्यासाठी खूप वेगानं काम करत असल्याचं ते म्हणाले. येत्या ४ डिसेंबरला साजरा होणारा नौदल दिन म्हणजे, आपल्या नौदल सैनिकांचं साहस आणि पराक्रमाचा सन्मान करणारा दिवस असल्याचं ते म्हणाले.
या निमित्तानं प्रधानमंत्र्यांनी देशभरातल्या विविध नौदल संग्राहलयांविषयी माहिती दिली, आणि या संग्रहालयांनी भेट द्यावी असं आवाहनही श्रोत्यांना केलं.
कृषी क्षेत्रातली देशाची प्रगतीही त्यांनी श्रोत्यांशी सामायिक केली. देशानं ३५७ दशलक्ष टन इतक्या प्रमाणात अन्नधान्याचं उत्पादन करून ऐतिहासिक विक्रम केला. आहे, गेल्या दहा वर्षांच्या तुलनेत हे प्रमाण १०० दशलक्ष टनांनी जास्त असल्याचं ते म्हणाले.
गेल्या काही वर्षांत मधाची निर्यात तीन पटीपेक्षा जास्त झाली आहे, देशाचं मध उत्पादन दीड लाख टनांपेक्षा जास्त झालं आहे, मध अभियानाअंतर्गत खादी ग्रामोद्योगानं सव्वा दोन लाखापेक्षा जास्त मधमाशी पालन पेट्यांचं वाटप केलं आहे अशी माहिती त्यांनी दिली. यानिमित्तानं त्यांनी देशभरातील विविध राज्यांमध्ये वैशिष्ट्यपूर्ण मध उत्पादनासाठी सुरु असलेल्या प्रयत्नांबद्दलची माहिती त्यांनी दिली.
नैसर्गिक शेती हा भारताच्या प्राचीन परंपरांचा भाग, असून धरती मातेच्या रक्षणासाठी नैसर्गिक शेतीला प्रोत्साहन देणं हे आपलं सर्वांचं कर्तव्य आहे, असंही ते म्हणाले.
क्रीडा क्षेत्रातल्या यशाचा उल्लेखही त्यांनी केला. महिला कबड्डी विश्वचषक स्पर्धेचं जेतेपद यासह जपानमधल्या कर्णबधीर व्यक्तींच्या डेफ ऑलिम्पिक, तसंच जागतिक मुष्टीयुद्ध चषक स्पर्धेत भारतानं केलेली पदकांची लयलुट याविषयी त्यांनी सांगितलं. दृष्टीहीन महिलांनी जिंकलेला पहिलाच टी ट्वेंटी क्रिकेट विश्वचषक म्हणजे देशाच्या क्रीडा इतिहासातल्या सर्वात मोठ्या यशांपैकी एक आहे असं ते म्हणाले. या खेळाडूंचा आत्मविश्वास, त्यांचा समर्पणभाव, जिद्दीतून आपल्याला खूप काही शिकायला मिळतं. त्यांचा विजय, प्रत्येक भारतीयाला प्रेरणा देत राहील असं त्यांनी सांगितलं. आयर्नमॅन ट्रायथलॉन सारख्या इन्ड्युरन्स स्पोर्टस च्या वाढत्या लोकप्रियतेमुळं तंदुरुस्तीला प्रोत्साहन मिळत असल्याचंही त्यांनी नमूद केलं.
प्रधानमंत्र्यांनी देशाचा गौरव वाढवणाऱ्या सांस्कृतिक आणि इतर घडामोडींचाही उल्लेख केला. काही दिवसांपूर्वीच साजरा झालेला संविधान दिन, तसंच वंदे मातरम् या गीताला दीडशे वर्षे पूर्ण होत असल्याबद्दल देशभरात होत असलेले कार्यक्रम, अयोध्येत राम मंदिरावर झालेलं धर्मध्वजाचं आरोहण, कुरुक्षेत्रातल्या पांचजन्य स्मारकाचं लोकार्पण यांविषयी त्यांनी सांगितलं. कुरुक्षेत्रात झालेल्या आंतरराष्ट्रीय गीता महोत्सवानिमित्तानं विविध देशांत झालेल्या कार्यक्रमांची माहिती त्यांनी दिली.
राष्ट्रीय संग्रहालयातले भगवान बुद्धांचे पवित्र अवशेषांचं भूतान, रशियासह, मंगोलिया, व्हिएतनाम आणि थायलंड अशा अनेक देशांमध्ये प्रदर्शित केले जात असल्याचा उल्लेख त्यांनी केला. अशा प्रयत्नांमधून जगभरातले लोक परस्परांशी जोडले जात आहेत असं ते म्हणाले. येत्या २ डिसेंबर पासून सुरू होणाऱ्या चौथ्या काशी-तमिळ संगमम मध्ये सहभागी होण्याचे आवाहन त्यांनी केले.
यंदाच्या सणासुदीच्या काळात देशातल्या कोट्यवधी लोकांनी व्होकल फॉर लोकल या भावनेला आपल्या जीवनाचा भाग बनवलं असल्याचं ते म्हणाले. नुकत्याच झालेल्या जी ट्वेंटी परिषदेच्या निमित्तानंही आपण व्होकल फॉर व्होकल हा मंत्र जपला, आणि जागतिक नेत्यांना दिलेल्या भेटवस्तूंमध्ये स्थानिक भावनेवरच भर दिला असं ते म्हणाले. आगामी ख्रिसमस आणि नवीन वर्षाच्या खरेदीसाठीही नागरिकांनी व्होकल फॉर लोकल हा मंत्र लक्षा ठेवावा आणि देशात बनलेल्या वस्तुंची खरेदी करावी असं आवाहन त्यांनी केलं.
नुकत्याच सुरु झालेल्या थंडीच्या हंगामाचा उल्लेख करून, त्यांनी देशाच्या हिवाळी पर्यटन क्षमतांबद्दल सांगितलं. यंदाच्या हिवळ्यात पर्यटनाचा विचार करताना देशातच हिमालयातील डोंगररांगाचा विचार करावा असं आवाहन त्यांनी केलं.
