जपानी तंत्रज्ञान आणि भारताच्या प्रतिभेच्या एकात्मिकीकरण या शतकातल्या तंत्रज्ञान क्रांतीचं नेतृत्व करू शकते असं प्रधानमंत्री नरेंद्र मोदी यांनी म्हटलं आहे. प्रधानमंत्र्यांनी आज टोकियो इथं भारत-जपान आर्थिक मंचाला संबोधित केलं, त्यावेळी ते बोलत होते. जपान हे तंत्रज्ञानाचं तर भारत प्रतिभेचं ऊर्जा भांडार असल्याचं ते म्हणाले.
भारत कृत्रिम बुद्धिमत्ता, सेमीकंडक्टर, क्वांटम कॉम्प्युटिंग, जैवतंत्रज्ञान आणि अंतराळ क्षेत्रात महत्त्वाकांक्षी उपक्रम राबवत आहे, तसंच आता भारत आपल्या संरक्षण आणि अंतराळ क्षेत्रांनंतर, अणुऊर्जा क्षेत्रही खासगी क्षेत्रासाठी खुलं करणार असल्याचं त्यांनी सांगितलं.
जपान हा भारताच्या विकासातील एक महत्त्वाचा भागीदार असून, मेट्रोपासून ते उत्पादन क्षेत्र तसंच सेमीकंडक्टरपासून ते स्टार्टअप्सपर्यंत प्रत्येक क्षेत्रात या भागिदारीची परस्पर विश्वासार्हता दिसून येते असं त्यांनी सांगितलं. आज अवघ्या जगाचं भारतावर लक्ष लागलं असून, जग भारताकडून आशा बाळगत असल्याचंही त्यांनी सांगितलं.
जपानचे प्रधानमंत्री शिगेरू इशिबा यांनीहीय या मंचाला संबोधित केलं. जपानचं प्रगत तंत्रज्ञान आणि भारताची प्रतिभा एकमेकांना पूरक असल्याचं ते म्हणाले. भारताच्या मेक इन इंडिया उपक्रमात अनेक जपानी कंपन्या महत्त्वाची भूमिका बजावत असल्याचं त्यांनी अधोरेखित केलं. दोन्ही देशांमध्ये झालेले नवे सहकार्य करार हे भारतात गुंतवणूक वाढवण्याच्या जपानच्या वचनबद्धतेचे प्रतिक असल्याचंही ते म्हणाले.
त्याआधी आज प्रधानमंत्री नरेंद्र मोदी दोन दिवसांच्या जपान दौऱ्यासाठी सकाळी टोकियो इथं दाखल झाले. यावेळी त्यांचं उत्साहात स्वागत केलं गेलं. या दौऱ्यात प्रधानमंत्री टोकियोमध्ये होणार असलेल्या पंधराव्या भारत-जपान वार्षिक शिखर परिषदेत सहभागी होतील.
या शिखर परिषदेदरम्यान, दोन्ही नेते परस्परांतल्या द्विपक्षीय संबंधांचा आढावा घेणार आहेत. तसंच गेल्या ११ वर्षांत वृद्धिंगत होत असलेली धोरणात्मक आणि जागतिक भागीदारी पुढे नेण्याच्या दृष्टीनंही चर्चा होण्याची अपेक्षा आहे. जपानच्या दौरा आटोपून प्रधानमंत्री चीन दौऱ्यावर जाणार आहेत. तिथं ते तियानजिन इथं होणार असलेल्या शांघाय सहकार्य संघटनेच्या शिखर परिषदेत ते सहभागी होतील.
