प्रधानमंत्री नरेंद्र मोदी यांच्या पंचाहत्तराव्या वाढदिवसानिमित्त विविध कार्यक्रम देशभरात होत आहेत
राष्ट्रपती द्रौपदी मुर्मू यांनी मोदी यांना शुभेच्छा दिल्या आहेत. मोदी यांनी असाधारण नेतृत्व आणि कठोर परिश्रम यांच्या जोरावर महान ध्येय साध्य करण्याची संस्कृती देशात रुजवली आहे, असं राष्ट्रपतींनी शुभेच्छा संदेशात म्हटलं आहे.
केंद्रीय मंत्रिमंडळाचे सदस्य, राज्याराज्यांचे मुख्यमंत्री, राजकीय आणि इतर अनेक क्षेत्रातल्या मान्यवरांनी मोदी यांचं अभिष्टचिंतन केलं आहे. मुख्यमंत्री देवेंद्र फडणवीस यांनी प्रधानमंत्र्यांना शुभेच्छा देत एक विशेष लेख आज प्रसिद्ध केला आहे. उपमुख्यमंत्री अजित पवार आणि एकनाथ शिंदे यांनीही प्रधानमंत्र्यांचं अभिष्टचिंतन केलं आहे.
प्रधानमंत्री नरेंद्र मोदी यांच्या जन्मदिनाचं औचित्य साधून भाजपातर्फे सेवा पर्व राबवण्यात येत आहे. यात ठिकठिकाणी सेवा, रक्तदान शिबिरं, स्वच्छता मोहिमा, व्याख्यानं, प्रदर्शनं इत्यादींचं आयोजन करण्यात आलं आहे.
माहिती आणि प्रसारण मंत्रालयातर्फे प्रधानमंत्र्यांच्या शालेय जीवनावर आधारित चलो जीते हैं या चित्रपटाचं पुनर्प्रदर्शन आज लहान मुलांसाठी करण्यात येणार आहे.