वादळग्रस्त श्रीलंकेच्या मदतीसाठी भारतानं ऑपरेशन सागर बंधू ही मोहीम हाती घेतली आहे. या मोहीमेअंतर्गत वैद्यकीय मदतीचा ८० टन साठा घेऊन एक विशेष विमान श्रीलंकेला पोहोचलं, तर आणखी एक विमान लवकरच पोहचेल. त्याआधी आयएनएस विक्रांत आणि आयएनएस उदयगिरी या भारतीय युद्धनौकांनी श्रीलंकेला मदत साहित्य पोहचवलं. भारतानं राष्ट्रीय आपत्ती प्रतिसाद दलाच्या ८० कर्मचाऱ्यांचा समावेश असलेली दोन शोध आणि बचाव पथकं श्रीलंकेला पाठवली असल्याची माहिती परराष्ट्र व्यवहार मंत्री डॉ. एस. जयशंकर यांनी दिली आहे.
प्रधानमंत्री नरेंद्र मोदी यांनी या नुकसानीबद्दल शोक व्यक्त केला असून, श्रीलंकेला सहकार्य करण्याची वचनबद्धता पुन्हा एकदा व्यक्त केली आहे. आता हे चक्रीवादळ श्रीलंकेच्या उत्तरेला वायव्येकडे सरकत असून, यामुळे जोरदार पाऊस आणि सोसाट्याच्या वाऱ्याचा इशाराही दिला गेला आहे.
