राज्यातल्या महानगरपालिका निवडणुकांसाठीच्या प्रचाराच्या तोफा आज थंडावल्या. एकंदर २९ महापालिकांमधल्या ८९३ प्रभागांमधल्या २ हजार ८६९ नगरसेवकांसाठी परवा मतदान होणार आहे. यासाठी एकूण १५ हजार ९३१ उमेदवार रिंगणात आहेत. सकाळी साडे ७ ते साडे ५ वाजेदरम्यान हे मतदान होणार आहे.
प्रचाराचा अखेरचा दिवस असल्यानं सर्व राजकीय पक्षांनी जोरदार प्रचार केला. मुख्यमंत्री देवेंद्र फडनवीस यांनी आज नागपुरात रोड शो केला. उपमुख्यमंत्री एकनाथ शिंदे यांनी मुंबईत, तर अजित पवार यांनी पुणे आणि पिंपरी-चिंचवडमध्ये रोड शो केला. राज ठाकरे यांनीही आज पुण्यात प्रचार केला. शिवसेनेच्या नेत्या आणि विधानपरिषदेच्या उपसभापती डॉक्टर निलम गोऱ्हे यांनी आज पुण्यात वार्ताहर परिषद घेऊन निवडणूक प्रक्रियेतल्या अनियमिततेवर ताशेरे ओढले.
ठाणे जिल्ह्यातल्या ठाणे, कल्याण डोंबिवली, नवी मुंबई, उल्हासनगर, मिरा भाईंदर, आणि भिवंडी निजामपूर महानगरपालिका निवडणुकीसाठी विविध पक्षाच्या उमेदवारांनी प्रचारफेऱ्या काढल्या. तसंच ठाणे पोलिसांनी पथसंचलन करत नागरिकांना निर्भयपणे मतदान करण्याचं आवाहन केलं.
जालना महानगरपालिकेत उमेदवारांनी प्रचारफेऱ्या काढल्या तसंच मतदारांच्या गाठीभेटी घेतल्या.
सांगली महानगरपालिकेत भाजपा आमदार गोपीचंद पडळकर यांनी पदयात्रा काढली.
चंद्रपूर महानगरपालिका निवडणुकीच्या प्रचारासाठी आज काँग्रेसने विविध प्रभागात रोड शो केले. यावेळी काँग्रेस प्रदेशाध्यक्ष हर्षवर्धन सपकाळ यांनी भाजपावर जोरदार टीकास्त्र सोडलं.
