अन्नपदार्थांमध्ये भेसळीबाबतच्या तक्रारींबाबत सरकार तातडीनं कडक कारवाई करत असल्याची ग्वाही अन्न आणि नागरी पुरवठा मंत्री प्रल्हाद जोशी यांनी आज लोकसभेत पुरवणी प्रश्नांच्या उत्तरात दिली. अशा तक्रारी दाखल होताच त्याची चौकशी करून हे अन्नपदार्थ खाण्यायोग्य नसल्याचं आढळल्यास संबंधितांवर सरकार फौजदारी कारवाई करत असल्याचं जोशी यांनी नमूद केलं.
विविध अन्नपदार्थांच्या चाचणीसाठी देशभरात एफ एस एस ए आयच्या २४२ प्रयोगशाळा तसंच चालत्या प्रयोगशाळाही कार्यरत असल्याचं त्यांनी सांगितलं. भेसळयुक्त अन्नपदार्थांबाबत जागृती निर्माण करण्यासाठी सरकार समाजमाध्यमांचा मोठ्या प्रमाणावर वापर करत असल्याची माहिती त्यांनी दिली. आणखी एका प्रश्नाला उत्तर देताना, राष्ट्रीय ग्राहक हेल्पलाईन, ग्राहक सुरक्षेत मोठी भूमिका बजावत असल्याचं जोशी यांनी नमूद केलं.